Kasım ayın 21-dä 2019 yılda Valkaneş dolayında, A. Doljnenkonın adına liţeyindä gagauz dili hem literatura üüredicilerin dolay (rayon) metodika topluşu geçti.
Metodika topluşun temasıydı: «Üürenicilerin komunikativ kompetenţiyasının oluşturması hem ilerlenmesi Gagauz dili hem literatura, Gagauz halkın istoriyası, kulturası hem adetleri disţiplinalarda».
Açık uroo 12-ci klasta geçirdi üüredici – Dora Panteleevna Onofrey. Urokta açıklandı N. Baboglunun avtobiografiyalı annatması “Masallı toprak” duuma taraf için, paalı hem sevgli. Hem taa klastan dış uroo 9-cu klasta verdi, angısı intelektual viktorina formasında geçti. Üüredici, bir profesional usta gibi, hem metodika, hem yaratıcılık uurundan zengin derslär gösterdi.
Dora Panteleevna dersini başladı anılmış rus yazıcının, M. Gorkiyin, çok maanalı laflarınnan, angıları çaarardılar bilmää, sevmää geçmişimizi, halkımızı, istoriyamızı.
Dersin etapları belliydi, sınırlıydı. Üüredici kullandı çok türlü tehnikalar, metodlar, angıları zenginnederlär hem havezlendirerlär üürenicileri çalışmaa. Onnarın arasında: serbest asotiatiya, intervyu, prezentaţiyalar, kullanmak interaktiv taftasını.
Ders şıralıydı, emoţiyalıydı, dalgalıydı, angısı verdi kolaylık o genç cancaazlara içindän geçirmää istoriyanın o karannık zaman sayfalarını. Üüredici tamamnadı konulmuş neetleri: komunikativ kompetenţiyanın ilerlemesi, gagauzlaa, istoriyamıza sevgi, saygı terbiyedilmesi, yaratıcılık becermeklerin gelişmesi, kendi düşünmeklerini. Üürenicilerä verildi kolaylık autonotalamak hem argumentlemäk.
Evdeki işindä verildi yaratıcılık işi, angısı yardımcı olacek diil sade üürenicilerin yaradıcılıını ilerletmää, ama derindän annamaa halkımızın geçmişini. Bu zengin, meraklı ders için üüredicimizä «saa olsun» deeriz hem başarılar dileeriz.
İntelektual viktorinada «Benim oyunum» soruşlar baalıydı gagauz dilinnän, literaturaylan, gagauz halkın istoriyasınnan, kulturasınnan hem adetlerinnän.
Onnarın arasında vardı ölä soruşlar, nica önemni datalar, adetlär, yortular, küülar, yazıcılar h.b. Üürenicilär may hepsi soruşlara cuvap verdilär, bu gösterer onnarın zengin bilgi uurunu hem üüredicinin kompetentliini.
Komanda adları da çok uygundular, angıları terbiyetmäk funkţiyasını taşıyardılar: «Dostluk», «Halk sedefleri». Komandalar tanıştırdılar kendilerini gözäl, argumentleyeräk hem açıklayarak gagauz halkın moral kalitelerini.
