{"id":4798,"date":"2024-04-13T17:18:45","date_gmt":"2024-04-13T14:18:45","guid":{"rendered":"https:\/\/vulcanesti.md\/?p=4798"},"modified":"2024-04-13T17:23:08","modified_gmt":"2024-04-13T14:23:08","slug":"aprilin-13-unda-saveliy-ekomomov-tamannayaceydi-95-yasini","status":"publish","type":"post","link":"https:\/\/vulcanesti.md\/md\/aprilin-13-unda-saveliy-ekomomov-tamannayaceydi-95-yasini\/","title":{"rendered":"APR\u0130L\u0130N 13-\u00dcND\u00c4 SAVEL\u0130Y EKOMOMOV TAMANNAYACEYDI 95 YA\u015eINI"},"content":{"rendered":"\n

\u015eANNI \u00dc\u00dcRED\u0130C\u0130M\u0130Z<\/strong>

<\/strong>Saveliy Petrovi\u00e7 Ekonomov (1929\u20132009) ya\u015fad\u0131 zor, ama pek merakl\u0131 bir \u00f6m\u00fcr. \u00dc\u00fcredici, yaz\u0131c\u0131, folklorcu, kinocu, avc\u0131, bal\u0131k\u00e7\u0131, ba\u015f\u00e7\u0131vanc\u0131 \u2013 bu zanaatlarlan doluydu onun ya\u015famas\u0131. Herbir uurda o becerikliydi, ba\u015far\u0131l\u0131yd\u0131, \u00e7\u00fcnk\u00fc i\u015fini yapard\u0131 havezl\u00e4n hem sevgiyl\u00e4n.

\u0130lk erd\u00e4 \u2013 \u00fc\u00fcredicilik. \u00dc\u00fcrenip T\u00fcl\u00fck\u00fc\u00fcd\u00e4 \u015fkolada, Tumarvada (\u015findiki Reni kasabas\u0131) zanaatl\u0131k \u015fkolas\u0131nda, Valkane\u015ft\u00e4 hem Ki\u015fin\u00f6vda kursalarda, Kaulda pedagogika \u015fkolas\u0131nda, Tiraspold\u00e4 pedagogika institutunda, Saveliy Petrovi\u00e7 \u00e7ok y\u0131l \u00e7al\u0131\u015fm\u0131\u015f \u015fkolada. G\u00f6t\u00fcrm\u00fc\u015f d\u00f6rt predmet \u2013 moldovan dilini, rus dilini, gagauz dilini hem muz\u0131kay\u0131. \u0130\u015flemi\u015f organizator, gec\u00e4 \u015fkolas\u0131nda direktor.

\u00c7ok zorluk \u00e7ekmi\u015f Ekonomovlar\u0131n aylesi. Varm\u0131\u015flar be\u015f karda\u015f: Vasi, \u00d6rgi, Sava, Andon\u00e7u hem Andrey. 1944-cu y\u0131lda k\u0131\u015f\u0131n tift\u00e4n ge\u00e7inmi\u015f analar\u0131 Ustiniya F\u00f6dorovna. Ertesi y\u0131l\u0131n bobalar\u0131 P\u00f6tr Antonovi\u00e7, ang\u0131s\u0131 rumun vak\u0131d\u0131nda i\u015flemi\u015f primariyada sekretar, d\u00fc\u015fm\u00fc\u015f kapana. Hep o y\u0131l\u0131n ge\u00e7inmi\u015f Vasi bat\u00fclar\u0131. 1949-cu y\u0131lda stalinistl\u00e4r kald\u0131rm\u0131\u015flar Saveliy Petrovi\u00e7i Rusiyan\u0131n Sibir taraf\u0131ndak\u0131 Altaya, nered\u00e4 o ya\u015fam\u0131\u015f edi y\u0131l \u2013 be\u015f y\u0131l i\u015flemi\u015f t\u00fcrl\u00fc zor i\u015flerd\u00e4, bitki iki y\u0131l da \u00fc\u00fcredicilik etmi\u015f. \u00abO g\u00fcnn\u00e4r, ani ge\u00e7irdik yolda hem Altay bay\u0131rlar\u0131nda, \u2013 yazard\u0131 o taa sora, \u2013 dayma gelerl\u00e4r akl\u0131ma da brakm\u00ea\u00earlar beni raada. Zordu, ama kimsey \u00f6lmediydi ne kah\u0131rdan, ne suuktan, ne d\u00e4 aa\u00e7l\u0131ktan, zer\u00e4 caba biz\u00e4 dememi\u015fl\u00e4r gagauz, kimd\u00e4 kalm\u0131\u015f oguz kan\u0131\u00bb.

S. Ekonomovun \u00e7al\u0131\u015fmalar\u0131nda b\u00fc\u00fck er kapl\u00ea\u00ear yaz\u0131c\u0131l\u0131k hem folklorculuk zaametleri. 1957 y\u0131lda Saveliy Petrovi\u00e7 \u00e7ekeder toplamaa halk yaratmalar\u0131n\u0131 \u2013 t\u00fcrk\u00fc, masal, maani (bas\u0131ld\u0131lar 2018 y. G. Gaydarc\u0131n\u0131n kiyad\u0131nda \u00abGagauzlar\u0131n halk yaratmalar\u0131\u00bb). Hep o y\u0131l\u0131n ba\u015fl\u00ea\u00ear yazmaa peet. Taa sora giri\u015fer yazmaa annatma. \u00c7\u0131kt\u0131ynan 1988 y\u0131lda pensiyaya, enid\u00e4n topl\u00ea\u00ear hem erle\u015ftirer halk yaratmalar\u0131n\u0131, yaz\u00ear annatma, ang\u0131lar\u0131nda a\u00e7\u0131kl\u00ea\u00ear b\u00fct\u00fcn ya\u015famas\u0131nda ge\u00e7irdiklerini. Onun yazd\u0131klar\u0131 \u00e7\u0131k\u00earlar gazetalarda (\u00abAna s\u00f6z\u00fc\u00bb, \u00abGagauz Sesi\u00bb h. b.), jurnallarda (\u00abSabaa Y\u0131ld\u0131z\u0131\u00bb, \u00abG\u00fcne\u015f\u00e7ik\u00bb, \u00abAyna\u00bb h. b.), \u015fkola kiyatlar\u0131nda hem literatura almanahlar\u0131nda. Ama avtorun vard\u0131 taa bir arzusu \u2013 \u00e7\u0131karmaa yaz\u0131lar\u0131n\u0131 ay\u0131r\u0131 bir kiyatta.<\/p>\n\n\n\n

2003 y\u0131l\u0131n ba\u015f\u0131nda Saveliy Petrovi\u00e7 yollad\u0131 bana ma\u015finkadan ge\u00e7irilmi\u015f hem b\u00fc\u00fck skrepkalarlan s\u0131k\u0131lm\u0131\u015f \u00fc\u00e7 tom \u2013 1. Zavall\u0131 \u00fc\u00fcredici (1994); 2. Annatmalar (1997); 3. Gagauz halk masallar\u0131. Ay\u0131r\u0131 bir konvertt\u00e4 kablettim ondan dokuz patret, en eskileri \u00e7\u0131kar\u0131lm\u0131\u015f taa 1953 y\u0131lda Altayda. Sora a\u00e7t\u0131 bana telefon da dedi dan\u0131\u015fay\u0131m Ki\u015fin\u00f6vda bizim gagauzlara da, eer yak\u0131\u015farsa, yard\u0131m edelim \u00e7\u0131karmaa bir kiyat. Ay\u0131r\u0131 bir yaprakta Saveliy Petrovi\u00e7 yollam\u0131\u015ft\u0131 \u00fc\u00e7\u00fcnc\u00fc \u00fczd\u00e4n yaz\u0131l\u0131 k\u0131saca biografyas\u0131n\u0131. Bana o biografiya g\u00f6r\u00fcnd\u00fcyd\u00fc kayet k\u0131sac\u0131k, da b\u00e4n teklif ettim avtora geni\u015fletsin onu hem yazs\u0131n birinci \u00fczd\u00e4n, ki olsun diil biografya, ama avtobiografya. Birka\u00e7 g\u00fcnd\u00e4n sora kablederim po\u00e7tadan eni variant\u0131 \u2013 ma\u015finkadan 8 sayfa! Bir par\u00e7a sararm\u0131\u015f yaprakta da Saveliy Petrovi\u00e7 yazm\u0131\u015ft\u0131 kendi elinn\u00e4n:

\u00ab<\/em>Sel\u00e4m, P\u00f6tr Afanasyevi\u00e7. Bu avtobiografiyay\u0131 kotar kendin, nas\u0131l hem <\/em>nereyi koyacan. Kimi eri onun olmad\u0131 \u00fcreem\u00e4 g\u00f6r\u00e4. Oldu uzun, ama biraz k\u0131saltt\u0131ynan, benimc\u00e4, olur taa isl\u00e4\u00e4. Bitkisini s\u0131kt\u0131m \u2013 eti\u015fmedi kuvedim. Kolum
sesl\u00e4meer, tutam\u00ea\u00ear kalemi…<\/em>

Sel\u00e4m hepsiniz\u00e4. B\u00fc\u00fck sayg\u0131ylam, S. Ekonomov\u00bb.<\/em>

Dan\u0131\u015ft\u0131yd\u0131m birka\u00e7 gagauza, ang\u0131lar\u0131n\u0131 sayard\u0131m zengin, ama yard\u0131m verdi sade bir cana yak\u0131n adam \u2013 Saveliy Petrovi\u00e7in \u00fc\u00fcrenicisi Evgeniy Panteleevi\u00e7 Hac\u0131. \u0130kinci sponsor olduydu T\u00fcrkiya B\u00fc\u00fckel\u00e7ilii. Da tezd\u00e4 d\u00fcnneyi g\u00f6rd\u00fc Saveliy Petrovi\u00e7in ilk kiyad\u0131 \u00abZavall\u0131 \u00fc\u00fcredici\u00bb (2003 y.), nereyi girdi o tomnar\u0131n ilk ikisi. Ger\u00e7ek, avtobiografiyas\u0131n\u0131 k\u0131saltmad\u0131yd\u0131m, \u00e7\u0131karmad\u0131yd\u0131m ondan bir d\u00e4 laf. Saveliy Petrovi\u00e7 2009 y\u0131lda yanvar\u0131n 14-d\u00e4 raametli oldu.<\/p>\n\n\n\n


Ge\u00e7ti taa birka\u00e7 y\u0131l. Sevinerim, ani Gagauziyada bulundu kolayl\u0131k haz\u0131rlamaa hem tiparlamaa onun eni kiyad\u0131n\u0131, ne\u00e7inki Saveliy Petrovi\u00e7 haliz laf ustas\u0131yd\u0131, k\u00e4\u00e4mil yaz\u0131c\u0131yd\u0131. Bu kiyada, ang\u0131s\u0131 haz\u0131rland\u0131 M.V. Marunevi\u00e7 ad\u0131na Bilim-aara\u015ft\u0131rma merkezind\u00e4, girdi yaz\u0131c\u0131n\u0131n en k\u00e4\u00e4mil yaratmalar\u0131 \u2013 annatmalar, peetl\u00e4r, publi\u021bistika yaz\u0131lar\u0131, folklor janralar\u0131ndan \u00f6rnekl\u00e4r. Bundan kaar\u00e4, kiyada koyduk an\u0131lm\u0131\u015f \u00fc\u00fcredicimiz i\u00e7in akl\u0131na getirmekleri, onun bibliografiyas\u0131n\u0131.\u00a02020 y\u0131lda yanvar\u0131n 27-d\u00e4\u00a0Komratta\u00a0ge\u00e7ti\u00a0kiyad\u0131n prezenta\u021biyas\u0131, nereyi kat\u0131ld\u0131lar bilimcil\u00e4r, yaz\u0131c\u0131lar, jurnalistl\u00e4r, muzey zaamet\u00e7ileri. T\u00fcl\u00fck\u00fc\u00fcd\u00e4n geldi yaz\u0131c\u0131n\u0131n k\u0131z\u0131 Elizaveta Savelyevna Dragneva, li\u021beyin direktoru Varvara \u0130vanovna Kemen\u00e7eci, ba\u015flank\u0131 klaslar \u00fc\u00fcredicisi Valentina \u0130ordanovna Karanfil, k\u00fc\u00fc muziyinin direktoru Stefanida Mihaylovna Pan\u00e7eva.<\/p>\n\n\n\n

\"\"<\/figure>\n\n\n\n

Gagauzlar unutm\u00ea\u00ear S. P. Ekonomovu hem kulturam\u0131zada onun hay\u0131rl\u0131 yapt\u0131klar\u0131n\u0131. Ona verildi ad Gagauziyan\u0131n \u015fann\u0131 \u00fc\u00fcredicisi. T\u00fcl\u00fck\u00fc\u00fc teoretik li\u021beyi, nered\u00e4 o \u00e7ok y\u0131l zaamet etti, b\u00fc\u00fcn ta\u015f\u0131y\u00ear onun ad\u0131n\u0131. K\u00fc\u00fc muzeyind\u00e4 onun ya\u015famas\u0131 i\u00e7in annad\u00ear ay\u0131r\u0131 bir stend. Gagauzlar dayma hat\u0131r g\u00fcderl\u00e4r talantl\u0131 hem cana yak\u0131n soyda\u015f\u0131na. Ama b\u00e4n say\u00ear\u0131m, ani bu adam\u0131n hat\u0131r\u0131 i\u00e7in l\u00e4\u00e4z\u0131m yapmaa taa bir i\u015f \u2013 duuma k\u00fc\u00fcy\u00fcnd\u00e4 (bekim, li\u021beyin \u00f6n\u00fcnd\u00e4) koymaa ona bir an\u0131t.<\/p>\n\n\n\n

Petri \u00c7ebotar<\/strong><\/p>\n\n\n\n