MD/RO
Nikolay Petroviç Pavlioglu — Valkaneş kasabasının en yaşlı yaşayannarın birisi. O çok bütün yaşamasını sayardı, ani 1926-cı yılda duudu, da gelän yıla 100 yaşını tamannayacȇk. Ama geçennerdä, arhiv materiallarından belli oldu, ani o 1923-cüdä duumuş. Da o artık 100 yaşını aykırladı. Bu adamın ecelinä türlü olaylar düştülär. Vardı kahır da sevinmelik tä. Ama bakmayarak hepsi zorluklara o kendisini kısmetli sayȇr. Nikolay Petroviç Pavlioglu GRT kanalında «Onnar bizä örnek» programasının kahramanı oldu. на канале GRT. Programanın avtoru — A.Terzi annadȇr bu adam için, açıklȇr onun ruhunu hem insannıını, angılarını o buncak yılların süresindä koruyabildi hem ecelinä hiç bir zaman sertleşmedi.Nikolay Petroviç Pavlioglu yaşanmış yılları için şükürlüklän söleer: «Şükür büünkü günä. Acım yok. Uşaklarım beni bakȇrlar». Nikolay Petrovicin küçüklüü zormuştu. Haliz o kara aaçlık zamanında. «Anamız yapardı bir turtacık. Hepsimizä pay edärdi. Konserva tenekicii, un yapardık günnendi sapın için alırdık da katardık kayaya da yapardık un»,- söledi Nikolay Petroviç.Şkolada o üürenmemiş. İşlemää pek erken başlamış.«Donnar yamalı. Sade dikişlär beliydi. Herersi yama-yama»,-annattı adam.Nikolay Petroviç çok yıl kolhozda işledi. İşi sekseni aykırladıynan braktı.«Bän kolhozda işledim. İşledim 17 yıl domuzçu. Sora işledim traktur brigadasında. Başçavancı oldum. Kaavicäydim kızım. Bilmäzdim acısın benim, kuvedim olmasın»,- söledi Nikolay.Aylesi kısmetliydi. Eşinnän uygunnukta hem annaşmakta uşaklarını büüttülär.«Hepsi büüdü. Şindi kaldı üç. İkisini kaybettik»,- paylaştı Nikolay Petroviç.«En önemni, ki ayledä saygı olsun», — söler Nikolay Petroviç. «Bän bilmeerim karıya urayım, yada süüyeyim, azarlayım». Açan karı-koca annaşȇr ozaman var annaşmak. Açan annaşmȇrlar — ozaman yok annaşmak»,- ekledi o.Nikolay Petrovicin kızı Fedora Bulgar şükürlü, ani bobası saa.«Yaşadık pek islää. Benim anam ikincii di, ama lafedirdilär gözlärlän. İslää yaşadık»,- söledi eşi.Nikolay Petroviç Pavlioglu şeviner, ani bu yaşta o ayakta. O kendisini kısmetli sayȇr. «Şükür! Avşamnen kalkarkana hem avşamnen yatarkana Allaha dua ederim! Kuvetçiim kendi-kendimä var. Lafımı şaşırtmȇȇrım hiç. Yaşadım doyunca bu toprakta»,- nışannadı Nikolay Petroviç.
